Buwan ng Wikang Pilipino, Buwan ng Wikang Pambansa

Ganap na sa ating mga Pilipino lalong-lalo na sa mga kabataang mag-aaral ang pagdaraos ng isang pagdiriwang pagsapit ng Agosto, na tinaguriang "Buwan ng Wika" sa kadahilan ang ginugunita sa buwang ito ang dating Pangulong Manuel L. Quezon na kinikilalang "Ama ng Wikang Pambansa."

Taon-taon isinasagawa ang nasabing pagdiriwang sa pamamagitan ng pagkakaroon ng mga palatuntunan sa mga paaralan at pati na rin sa iba ng mga pook pampubliko. Isinasagawa natin ang kagaya ng mga ito. Ngunit alam ba natin ang tunayna katuturan at kahalagahan ng wika?

"Ang hindi magmahal sa sariling wika ay higit sa hayop at malansang isda; kaya ating pagyamaning kusa, gaya ng inang sa atin ay nagpala." Ito ang tanyag na katagang nagmula sa ating pambansang bayani na si Gat. Jose Rizal na nagbibigay kahalagahan sa wika sa buhay ng isang tao.

Ang wika ng isang bansa ay masasabing siyang kaluluwa na nagbibigay buhay dito. Ito ang nagsisilbing tulay na nagdurugtong sa mga kumunidad na naninirahan sa isang bansa. Sa pamamagitan ng wika, nagkakaunawaan at nagkakaisa ang bawat tao. Higit sa lahat, nagsisilbi ito bilang ating pagkakakilanlan. Dahil dito ay nakikita ang iba’t ibang impluwensya sa bansa na siyang nakapagpabago at humulma sa pagkatao ng mga mamamayan. Samakatuwid, ang wika ay batayan ng natatanging kultura ng isang bansa.